ដោយ៖ ស-សម្បត្តិ

ភ្នំពេញ៖សមាគមសហព័ន្ធ ភ្នាក់ងារសេវាកម្ម​ពន្ធដារកម្ពុជាហៅថា CTAFA បានបើកកិច្ចប្រជុំរបស់ខ្លួនដើម្បីពិនិត្យតាមដាននិងវាយតម្លៃលើវឌ្ឍនភាពការងារក្នុងឆមាសទី១ឆ្នាំ២០២៤ ដែលធ្វើឡើងនៅរាជធានីភ្នំពេញ កាលពីរសៀលថ្ងៃទី១៩ ខែកក្កដា ឆ្នាំ២០២៤។

កិច្ចប្រជុំដ៏សំខាន់នេះគឺបានរៀបចំធ្វើឡើងដោយមានការអញ្ជើញចូលរួមពីសំណាក់ក្រុមប្រឹក្សាភិបាល ទីប្រឹក្សា និងគណៈកម្មការប្រតិបត្តិ របស់សមាគមCTAFA។

ឯកឧត្តម​ អ៊ុំ សារ៉ាវុធ ប្រធានសមាគម CTAFA បានបញ្ជាក់ថា សមាគមចាប់ពីពេលបានចុះបញ្ជីរហូតមកដល់ពេលនេះ គឺយើងបានរៀបចំរចនាសម្ព័ន្ធដឹកនាំ និងប្រមែប្រមូលនូវធនធានមនុស្ស ហើយបានបង្កើតគណៈកម្មការប្រឹក្សាយោបល់និងផ្តល់ដំណោះស្រាយហៅថា (គ.ប.ផ) ដែលជាឆ្អឹងខ្នងរបស់សមាគម ហើយគណៈកម្មការនេះ បានបំពេញតួនាទីនិងភារកិច្ចរបស់ខ្លួនយ៉ាងសកម្មបំផុតនៅក្នុងឆមាសទី១ឆ្នាំ២០២៤។

ឯកឧត្តមបានបញ្ជាក់ទៀតថា កិច្ចប្រជុំដែលមានការអញ្ជើចូលរួមពីថ្នាក់ដឹកនាំសមាគម ក្រុមប្រឹក្សាភិបាល និងជាពិសេស ទីប្រឹក្សាសមាគមនៅថ្ងៃនេះគឺដើម្បីទទួលយកនូវមតិយោបល់ល្អៗបន្ថែមទៀតដើម្បីជួយជំរុញឲ្យសមាគមបោះជំហានទៅមុខប្រកបដោយជោគជ័យ ស្របទៅតាមចក្ខុវិស័យនិងបេសកកម្មរបស់សមាគមដែលផ្តោតជាសំខាន់ទៅលើផ្នែកពន្ធដារ  គណនេយ្យ និងសវនកម្ម។

លោកជឹម ប៊ុនតិច អគ្គលេខាធិការ នៃអគ្គលេខាធិការដ្ឋានសមាគម CTAFA បានលើកឡើងលម្អិតពីវឌ្ឍនភាពការងារសំខាន់ៗ ដែលសមាគមរួមគ្នាខិតខំសម្រេចបាននៅក្នុងឆមាសទី១ឆ្នាំ២០២៤។ ក្នុងនោះសមាគមបានដាក់ចេញនូវទិសដៅក៏ដូចជាផែនការសកម្មភាពជាក់លាក់ដើម្បីអនុវត្ត។លោកអគ្គលេខាធិការក៏បានលើកឡើងពីអ្វីដែលកន្លងមកការអនុវត្តមិនទាន់បានពេញលេញឆ្លើយតបទៅនឹងផែនការដែលបានដាក់ចេញផងដែរ។

លោក ទេព សិដ្ឋាន់ណា អនុប្រធានសមាគម CTAFAនិងជាប្រធានគណៈកម្មការប្រឹក្សាយោបល់និងផ្តល់ដំណោះស្រាយហៅថា៖ (គ.ប.ផ) ដែលជាបុគ្គលដ៏សកម្មនៅក្នុងសមាគម បានលើកឡើងថា សមាគម CTAFA គឺមានសកម្មភាពធំៗជាច្រើន។ នៅក្នុងនោះលោកបានសង្កត់ធ្ងន់ទៅលើសកម្មភាពបណ្តុះបណ្តាលដែលកន្លងមកនេះ បានបង្កើតឲ្យមានគណៈកម្មការប្រឹក្សាយោបល់និងដំណោះ ស្រាយ(គ.ប.ផ) ដោយថ្នាក់ដឹកនាំសមាគមបានព្យាយាមកៀរគរជ្រើសរើសនូវធនធានមនុស្សដើម្បីធ្វើការរួមគ្នាដោយស្ម័គ្រចិត្តដែលធ្វើការចេញពីបេះដូងតែម្តង។

លោក ទេព សិដ្ឋាន់ណា បានឲ្យដឹងថា ដោយសារតែការលះបង់និងរួមគ្នាធ្វើការដោយស្ម័គ្រចិត្តចេញពីបេះដូងទាំងអស់គ្នានេះហើយ ដែលមកដល់ពេលនេះ សមាគមបានឈានទៅសម្រេចបង្កើតបាននូវផែនការយុទ្ធសាស្រ្តមួយដ៏សំខាន់ដែលបម្រើឲ្យផ្នែកបណ្តុះបណ្តាល។ ផែនការយុទ្ធសាស្រ្តរបស់ ( គ.ប.ផ )គឺមានគោលដៅយុទ្ធសាស្រ្ត៥ ហើយគោលដៅយុទ្ធសាស្រ្តទាំង៥នោះទៀតសោតគឺមានគោលដៅយុទ្ធសាស្រ្ត៣ដែលសង្កត់ធ្ងន់ទៅលើទិដ្ឋភាពផ្នែកពន្ធដារ,ទិដ្ឋភាពផ្នែកគណនេយ្យនិងសវនកម្ម និងទិដ្ឋភាពផ្នែកច្បាប់ពាណិជ្ជកម្មនិងច្បាប់អភិវឌ្ឍន៍កម្ពុជាដែលហៅថា CDC។

រីឯគោលដៅយុទ្ធសាស្រ្តទី៤ គឺការផ្សព្វផ្សាយពីរាល់សម្មភាពរបស់សមាគមដែលបានអនុវត្តទៅលើគោលដៅទាំង៣មាន (ពន្ធដារ គណនេយ្យ និងសវនកម្ម) ឲ្យធុរកិច្ចជនបានទទួលនូវរាល់ព័ត៌មានដោយជាក់លាក់។ គោលដៅទី៥គឺបម្រើឲ្យសកម្មភាពនៃគោលដៅទាំង៥ ធ្វើដូចម្តេចឲ្យសមាគមមានសកម្មភាពដំណើរការទៅមុខ ហើយមាននិរន្តរភាព។

នៅក្នុងកិច្ចប្រជុំនេះដែរ អ្នកចូលរួមទាំងអស់ជាពិសេស គឺក្រុមប្រឹក្សាភិបាល ,ទីប្រឹក្សា សុទ្ធតែបានចូលរួមផ្តល់នូវគំនិតយោបល់និងអនុសាសន៍ល្អៗដែលអាចចាត់ទុកជាធាតុផ្សំសំខាន់បំផុត ក្នុងការជួយជ្រោមជ្រែងបន្ថែមទៀតទៅដល់សមាគម ធ្វើយ៉ាងណាឲ្យក្លាយទៅជាសមាគមដ៏ធំមួយ និងរឹងមាំសម្រាប់ចូលរួមជួយបម្រើដល់ផលប្រយោជន៍ធុរកិច្ចជនដោយផ្តោតជាសំខាន់ទៅលើបញ្ហាពន្ធដារ,គណនេយ្យ និងសវនកម្មនេះឯង។

ឯកឧត្តម អ៊ុំ សារ៉ាវុធ ប្រធានសមាគម CTAFA បានថ្លែងអំណរគុណដល់ការខិតខំប្រែងរបស់សមាគមនិងបានទទួលយកនូវគំនិតយោបល់ល្អៗ ដែលជាធាតុចូលដ៏សំខាន់សម្រាប់បំពេញបន្ថែមទៅក្នុងផែនការសកម្មភាពរបស់សមាគមដែលមានស្រាប់ កំពុងតែអនុវត្តបច្ចុប្បន្ន ដើម្បីធ្វើយ៉ាងណាប្រែក្លាយឲ្យទៅជាកម្លាំងចលករដ៏មុតស្រួចជំរុញឲ្យសមាគមដ៏មានសារៈសំខាន់មួយនេះ បានក្លាយទៅជាសមាគមដ៏ធំមួយសម្រាប់ត្រៀមខ្លួនបម្រើទៅដល់ធុរកិច្ចជនជាពិសេសលើផ្នែកពន្ធដារ,គណនេយ្យ និងសវនកម្ម បានយ៉ាងពិតប្រាកដនៅកម្ពុជា៕